TACLOBAN CITY: Nagpagawas hin pagklaro an opisina han Executive Secretary, han pagsarang hiton himangraw nga pagkakadabi hiton anay Presidente ngan Presidente Marcos kasumpay ha pagpirma han General Appropriations Act (GAA) 2025.
Una hine, gin-aaligar nga gintawag ni anay Pangulong Duterte, nga may pagkai-iba ngan mga blanko an naaprubaran nga 2025 National Budget.
Ha nagin pahayag han anay Presidente Duterte, “It’s not only inaccurate, but I think the budget is in totality invalid. Hindi puwede mag-blanko blangko diyan sa pera ng tao,” Duterte said.
“That cannot be the valid – (it’s) invalid, unenforceable,” he added.
Kumo baton han opisina hiton Executive Secretary, waray may ginlat-angan nga blanko nga mga aludayday nga waray panginanu-a ugsa nga pirmahan hiton presidente.
An pagpasarang hin sayop nga impormasyon in sadang kondenahon kumo kriminalidad.
An ngatanan nga 4,057 ka paypay han 2025 National Budget in hul-os nga ginrepaso hin ginatos nga mga propesyonal nga mga tinaglawas tikang ha Kongreso ngan han Departamento han Budget and Management.
Ginsigurado han opisina hiton Executive Secretary, nga ginpag-istudyuhan nga ginginhimay usa-usa, an nasabi nga balaodnon ugsa nga maghimo ine nga balaod.
Imposible nga may makalimtan ngan malikatan, sugad han gin-aalegar han mga sayop nga impormasyon.
Pwede naman nga bisitahon an website hiton DBM agud nga makit-an nga waray kriminalidad ngan hukos-pukos nga natabo ha panginano han 2025 National Budget.
