TACLOBAN CITY – Guinklaro han tagmangulo han City Housing Authority han Tacloban nga may baratunon an National Housing Authority may kalabutan han napalit han developer nga mga substandard nga mga materyales ha pira nga mga pabahay nga guintukod ha norte nga parte han syudad.
Ini an naging pamahayag han tagmangulo han City Housing nga hi Ted Jopson pinaagi ha pakipaghimangraw han Bomboradyo Tacloban.
Guinmalatumat pa ni Jopson nga may mga engineer man unta an NHA nga amo an magmomonitor o manginginano kun ano nga klase hin materyales an mga guinpanmalit han developer.
Guinduon pa ni Jopson nga kun naghihingulang man hin tinaglawas an NHA, in pwede naman daw ini nga mag request hin kadugangan nga mga engineers.
Mababaruan nga damo an nagyayakan han pagiging substandard han mga pabahay mahitungod nga madagmit daw la nga nagkakagutak an semento han mga ini.
