TACLOBAN CITY – Gin malatumat ni Department of Interior and Local Government Leyte Provincial Director, Johannes Dorado nga kinahanglan anay magpatuman han mga ordinansa kasumpay han Safer Cities Ordinance ugsa magpahamtang han mga penalidad.
Ginpalusad manggud dida han Abril 8 an Memorandum Circular No. 2026-29 nga nag-aaghat ha mga Local Government Units nga igpatuman an mga lokal nga ordinansa kasumpay han ‘safer cities’.
Pira han mga ordinansa nga gin aaghat nga igpatuman ha mga lokal nga pangobyernuhan in an pag-ban han pag-inom hin mga makahurubog nga irimnom ha ligid han karsada o ha mga pampubliko nga lugar, paglu-lubas o paggawas hin nakalubas ha mga pampubliko nga lugar, ngan an paggamit hin videoke o bisan anu nga amplified audio devices tinikangan alas-10 hiton gab-i kutob alas-10 hiton aga han masunod nga adlaw.
Mag-aatubang naman hin penalidad an hin-o nga magtatalapas han nasabi nga mga ordinansa.
Para han pag-irignom ha ligid han karsada o diin man nga pampubliko nga lugar, an makakatalapas, para han municipal level, in magmumulta hin P500 para ha first offense, P1,000 para ha second offense, ngan P2,500 nga multa o pagkakapreso hin dire malahos unom kabulan o parehas para han third offense. Para naman ha cities ngan provincial level, an first offense in P1,000, an second offense in P3,000, ngan an third offense in P5,000 nga multa o kapresuhan nga dire malahos ha usa katuig, o parehas.
Para naman ha paggawas hin naka-lubas o paglu-lubas ha pampubliko nga lugar ngan paggamit hin videoke o anuman amplified audio devices ha sulod han iginbabawal nga oras, an mga penalidad in an masunod:
Ha mga barangay, an first offense, P500 nga multa, second offense, P750 nga multa, ngan third offense in P1,000 nga multa. Ha nga munisipyo naman, P500 nga multa an first offense, P1,000 an second offense, ngan P2,500 o kapresuhan nga dire malahos ha unom kabulan, o parehas an third offense. Samtang ha mga syudad ngan probinsya naman, an first offense in P1,000 nga multa, an second offense in P2,500, ngan an third offense in P5,000 o kapresuhan nga dire malahos ha usa katuig, o parehas.
Ha lain nga bahin, nagdig-on naman hi SILG Jonvic Remulla nga magpapadayon an istrikto nga implementasyon hini nga mga ordinansa ha kaluyo han mga reklamo ngan kritisismo tikang ha mga human rights advocates.
Dugang pa hini, samtang on-going an pagpapatuman han mga ordinansa in igpapailarom naman ha pag-rebyu an polisiya para ha mas maupay nga implementasyon hini.
