TACLOBAN CITY – Abuyon an pira nga mga kapitan ha syudad han Tacloban ha posibilidad nga pagpapasara han mga sementeryo yana nga Undas 2020.
Sumala kan Richard David Estrada, kapitan han Brgy. 55 Tacloban kun diin nahimumutang an El Reposo Public Cemetery, abuyon hira ha mao nga plano ingkaso nga igpalusad ini han city government tungod nga dako an maibubulig hini ha pagkontrol o paglikay han pagsarang han COVID-19 ha syudad.
Aminado naman ini nga damo nga mga katawhan ha syudad an mauulang pananglitan nga ipatuman an mao nga kamanduan labi na nga nakahiraan na han kadam-an an pagbisita ha ira mga minahal ha kinabuhi nga nanhiuna na ha kada pag-uulpot hiton piyesta han mga minatay.
Nanawagan naman an mao nga opisyal ha mga mapakadto ha El Reposo nga mas timpranuhon nala an pagbisita ha sementeryo san-o pa man mag-Undas agud nga dire na magkadaramo hin tawo.
Ginpasabot gihapon hini nga bisan waray pa opisyal nga kamanduan ha igbaw, dire na hira matugot ha ira barangay ha mga nagpaplano nga magbaligya o magnegosyo ha sementeryo yana nga Undas 2020.
