ODD NEWS- Usa nga medical student ha India an nadakop nga nanlimbong ha iya graduation exam gamit an gutiay nga Bluetooth device nga igintanom ha sulod han iya talinga!
Han nakalabay nga bulan han Pebrero 21, yana nga tuig, 78 nga medical students han Mahatma Gandhi Medical College an kumuha hin Bachelor of Medicine, Bachelor of Surgery final exam.
Mababaruan nga usa ha mga ine an duro ka desperado nga makapasar sanglit nga nagpa-implant ine hin Bluetooth device ha sakob han usa nga talinga para gamiton panlimbong.
Gamit an Bluetooth device, iko-connect niya ine ha wirelessly ha iya cell phone ngan pwede na nga tumawag han usa nga kakilala nga magtutdo ha iya hin sakto nga baton.
Matungod nga hurak an panlisbot ha mga exam ha India, may gintudlok nga mga team an kada kolehiyo o unibersidad nga magdumara hin physical search kada may final exams.
Nasakban an waray ngarani nga medical student han kapkapan ine ngan mahibaruan nga mayda gutiay nga cell phone nga nakatago ha secret pocket han iya saruwal.
Ginpailarom ha interrogation an estudyante ngan umamin nga may Bluetooth device hiya ha sulod han iya talinga nga ginpa-implant ha usa nga ENT surgeon.
Nahibaruan nga 11 katuig na ha medical school an estudyante ngan pira na kabeses nga dire napapasar ha exam.
Han nakalabay nga bulan gintagan na hiya hin warning han unibersidad nga last chance na niya nga kumuha hin exam sanglit nga ginpili nala hine nga malisbot agud nga pumasar.
Nakumpiskar an Bluetooth device han estudyante ngan gin-iimbestigaran han unibersidad kun may iba pa nga nagpa-implant hin kaparehos nga klase han cheating device.
