TACLOBAN CITY – Maabot ha 32 nga mga tricycle an gin-impound kakulop nga adlaw ha gindumara nga joint saturation drive han Business Permits and Licensing Division (BPLD) kaupod an Traffic Operations Management, Enforcement and Control Office (TOMECO) ngan Tacloban City Police Office (TCPO).
Sumala kan Ronnie Cornico, head han TOMECO, gin-impound an mao nga mga tricycle tungod han padayon nga pagbiyahe han mga ini ha kaluyo han kawaray mga permit.
Subay ha datus han BPLD, mahuman an Enero 30 nga deadline han business permit renewal, ha maabot 2,200 nga mga MCH ha syudad maabot la ha 900 an nakapagparenew han ira mga business permit kun diin ini in nangangaruyag signgon nga damo an mga colorum nga mga MCH nga nagbibyahe la gihapon.
Gindig-unan gihapon han TOMECO nga kun dire hira magdumara hin saturation drive, dire ini magiging patas ha mga MCH drivers/operators nga nagtuptop pagkuha hin business permit.
Maabot naman ha P500 an multa heton mga drivers/operators nga nadakop ngan pwede pa ini nga madugngan depende ha violations hini sugad han depekto ha sarakyan, kawaray garahe-an ngan iba pa.
Ginklaro naman han TOMECO nga tutugutan pa nga makapagrenew hin permit an mao nga naimpound nga MCH pero kinahanglan na nira nga magbayad hin penalidad tungod nga tapos na an deadline han business permit renewal han nakalabay nga bulan.
Ginlalauman naman nga madugngan pa an ihap han mga impounded tricycle tungod han padayon nga saturation drive yana nga adlaw.
