TACLOBAN CITY – Usa nga 44 anyos nga locally stranded individual ( LSI ) iton ginlugos han mismo bantay hini ha sakob han usa nga quarantine facility ha Sitio Cayangian, Brgy. Tinghub, Villaba, Leyte.
Base ha usa nga facebook video statement, ginkumpirmar hiton municipal administrator nga hi Teddy Vapor nga duha kabeses ginpanamas-tamasan han suspek an biktima nga LSI.
Base daw ha salaysay han biktima, syahan ini nga ginlugos dida han nakalabay nga Agosto 15 kon diin sumulod daw an mao nga security guard haiya kwarto ngan gintutukan ini hin pusil.
Waray daw makapalag an biktima tungod han iya kahadlok sanglit malinampuson nga nabuhat han suspek an iya maraot nga panuyo.
Dida liwat han nakalabay nga Lunes, Agosto 17 in utro na naman hiya nga gin-rape han suspek sanglit napugos na an biktima nga magsumat ha mga nurse nga bumisita haiya.
Dayon naman nga ginpadakop ni Mayor Jorge Gorge Veloso an suspek nga hi Ronnie Condes, 49 anyos, mahuman hini makarawat an sumbong han biktima.
Sumala kan Veloso nga diri niya kokonsetihon an mga sugad nga klase hin pan-aabuso sanglit nagmando ini ig-terminate hi Condes kumo usa ini nga job order employee han munisipyo.
Desido naman nga magpasaka hin kaso nga rape an 44 anyos nga biktima.
