ODD NEWS – Ginkalipay han mga commuters han Oxford Circus Tube Station an kakaiba nga pamaagi han pagbibiling hin mapapangasawa han usa nga ulitawo tikang ha Ealing, London, matungod nga imbes nga uboson an oras ha mga dating apps, gin-indorso hine an iya kalugaringon kumo usa nga ‘husband material’ gamit an mga billboards.
Gumastos hin 2,000 british pounds o sobra Php130,000 an ulitawo ha ‘wife searching’ ine in para ha duha nga billboards nga magdudugay naman hine duha kasemana ha mao nga tube station.
Sumala kan Jeevan Bhachu, 31-anyos ngan usa nga Indian-British, ginbutang niya an iya litrato ha 20-feet billboard ha paglaom nga ha sugad nga pamaagi in mabibilngan niya an iya mapapangasawa matungod nga han bumutho an pandemya in nakurian hiya nga gumawas ngan makipag-date.
Dugang pa hine, abre hiya ha bisan anu nga lahi para ha iya ideal partner pero mas maupay kun ine in mahigugmaon ha pamilya, mapa-inubsanon ngan may sense of humor.
Labot la ha iya litrato, nakabutang gihapon ha mao nga billboard an website kun diin pwede nga mag-apply an mga interesado nga kababayen-an gamit la an mga impormasyon kasumpay ha ira kalugaringon nga ngaran, hobby, ungara, kalakip na an ira litrato.
Hapagkayana in mayda na 50 nga applicants hi Bhachu nga padayon niya nga ginpapanginanu, ngan kun dire daw hiya papalaron nga mabilngan an iya future misis in igpapadayon la giihapon daw ine niya nga himuon ha ika-duha nga higayon.
