Padayon nga nagpe-pedal ngan waray plano umundang an 69-anyos nga lola tikang ha California mahuman niya makab-ot an Guinness World Record title nga “oldest unicycle rider (female)”.
Kilala ha agnay nga “Unicycle Granny,” sobra lima kadekada na nga nagpe-perform hi Linda Jarret. Nagtikang an iya pagkahilig ha unicycle dida han hiya an 10-anyos pala, hasta ha gin regaluhan hiya han iya tatay hin dako nga unicycle nga mayda kahitaas nga 6 feet dida han 13-anyos hiya.
Tikang hadto, umuswag an iya karera ha pagbulig ha mga circus, pag-arte kumo stunt double ha Hollywood, ngan paghimo hin mga delikado nga trapeze shows.
Nakuha niya an titulo dida han December 2025 han umagi hiya ha entablado sakay han usa nga 2 feet unicycle samtang nakasul-ot hin clown costume para ha produksyon han The Nutcracker.
Sumala kan Jarret, dire harumamay an paggamit han unicycle mahitungod nga kumpara ha ordinaryo nga bisikleta, nanginginahanglan ini hin waray undang nga pagbalanse ngan makusog nga pwersa tikang ha paa ngan tiyan.
Ha kaluyo han kadelikaduhan nga mabarian hin tul-an ha iya edad, malipayuon hiya nga nakakagpalipay han katawhan ngan ginpaplano pa niya maghimo hin panibag-o nga rekord pag-abot niya han ika-70 nga kaadlawon.
