ODD NEWS- Usa nga Marvel Cinematic Universe fan ha Florida, U.S.A. an naka-karawat hin pagkilala tikang ha Guinness World Record title nga “Most cinema productions attended of the same film” mahuman hine nga magkita ha sinehan han pelikula nga “Spider-Man: No Way Home” hin 292 ka beses!
Dire na bag-o para kan Ramiro Alanis an mao nga Guinness world record title, matungod nga han 2019, naka-karawat gihapon hiya matungod ha pagkita hin 191 ka beses han pelikula nga “Avengers: Endgame”.
Nawara naman ha iya an iya titulo han 2021 matungod nga usa nga lalaki ha Germany an nakakuha hine tikang ha iya.
Han nakalabay nga bulan, ginkumpirma han Guineess nga nabawi ni Alanis an titulo mahuman hine nga umatender hin 292 screenings han “Spider-Man: No Way Home” tikang han Disyembre 16, 2021 hangtod han Marso 15, 2022.
Mababaruan nga dire nagin madagmit ha mao nga lalaki nga mabawi an iya titulo matungod nga labot la nga gumastos hiya hin $3,400 para ha mga movie ticket, may rules an Guinness nga kinahanglan niya sundon sugad han ginpapagbawal nga paggamit han cell phone ngnan pumakadto ha comfort room samtang naka-play an pelikula.
