BARNSTAPLE, ENGLAND – Kun nagtatampo an epekto han makahurubog nga irimnon ngan illegal nga droga, maraot an resulta. Sugad an nahitabo ha usa nga lalaki ha Barnstaple, England nga naaktuhan han mga pulis nga ginpipirit an kalugaringon ha usa nga nakaparada nga ambulansya. Gindakop an “naka-high” nga lalaki ngan ginkasuhan.
Sumala ha mga pulis, una nga nakit-an an lalaki nga ginsunog an usa nga bag nga may sulod nga mani ha usa nga phone box. Pero waray hini naruyagan an ginbuhat sanglit ha usa nga nakaparada nga ambulansya nala an iya napagtripan.
Pumuwesto an lalaki ha unahan han ambulansiya ngan nakipaghilawas ha nakaparada nga sarakyan.
Gindakop an lalaki ngan gindara ha presinto. Labot la ha impluwensiya han makahurubog nga irimnon, tumira pa hin marijuana ngan shabu an lalaki rason han pagbuhat hini hin malain ha ambulansiya.
Napamatud-an han korte nga guilty an lalaki ha pag-ilarum han impluwensiya han irimnon ngan Class B nga droga. Ginsirotan hiya nga magbuhat hin community order with supervision ha sakob hin unom ka-bulan ngan multa nga 60 pounds.
