ODD NEWS- Usa nga lalaki ha China an daw gintuklaw hin halas nga usa katuig na nga nakababad ha botilya hin makahurubog nga irimnon.
Subay ha report nga ine nga lalaki in pumalit hin tulo kabotilya hin makahurubog nga irimnon, nga may nakababad nga halas para igpainom ini ha iya anak nga may grabe nga sakit.
Waray dayon abrehi han lalaki an mga botilya, ha pagtutuo nga mas epektibo ini ha pagtambal ha iya anak kun mababad ini hin mas maiha an mga halas.
Pagkalabay han usa katuig, gin abrehan na han lalaki an mga botilya ngan natigdaan ini han madiskubrehan nga mga buhi pa an mga halas ha sakob hini ngan gintuklaw hiya.
Dayon naman nga gindalagan ha ospital an lalaki, ngan naagapan naman an naangkon hini nga kagat.
May pagtutuo manggud ha Traditional Chinese medicine, nga nakakatambal hin magkadirudilain nga sakit an pag inom hin snake wine.
An proseso han paghimo hini in nagbubutang hin buhi nga makamandag nga halas, ha sakob hiton botilya nga mayda rice wine.
Sumala ha mga eksperto, posible nga nakasurvive an halas tungod nga dire mahugot an pagkakasarado han takop hini sanglit may oxygen la gihapon nga nakakasulod ha botilya.
