Tumalikod na ha kadayunan hi Felicien Kabuga, usa ha mga pangunahon nga suspek ha 1994 Rwandan genocide, samtang naaatubang ha pagdungog ha International Criminal Court (ICC) ha The Hague, subay ha United Nations.
Gin kumpirma han International Residual Mechanism for Criminal Tribunals nga namatay hi Kabuga ha usa nga ospital dida han Sabado, Mayo 16, ha edad nga 90.
Maiha nga iginkonsidera hi Kabuga kumo usa ha mga most wanted fugitives ha bug-os nga kalibutang mahitungod ha papel hini ha pagpopondo ngan pagsuporta ha genocide ha Rwanda dida han 1994, kun diin gin aalegar nada ha 800,000 katawo an namatay ha sulod ha hin pira kabulan.
Gin akusaran hi Kabuga, kumo usa ha mga ada ha luyo ha Radio-Television Libre des Mille Collines o RTLM, usa nga istasyon han radyo nga nag-aaghat ha mga ethnic Hutu nga patayon an mga Tutsi ha kakusgan han genocide.
Labot pa hini, gintotoohan nga nanhatag gihapon ini hin mga machete ngan sumuporta ha mga grupo nga dabi ha haluag nga pamatay.
Dida han 2020, naaresto hi Kabuga ha Paris mahuman an haros tulo kadekada nga pagtatago gamit an magkadiru-dilain nga peke nga pangilal-an ngan pasaporte.
Pagkahuman maaresto, igin balhin hiya ha The Hague kun diin gin atubang niya an mga kaso nga genocide, conspiracy to commit genocide, incitement to genocide, ngan crimes against humanity kaupod an murder ngan extermination.
Maduon naman nga igindiwara ni Kabuga an ngatanan han akusasyon ngan nagsalawad hin not guilty plea ha korte.
Dida han 2023, ginpaundang na han mga hukom an pagdungog mahuman nga igdeklara nga dire na ini physically ngan mentally fit nga umatubang ha korte.
Iginmando naman han presiding judge nga hi Graciela Gatti Santana an mahugot nga imbestigasyon ha rason ngan kabutang han pagkamatay ni Kabuga.
