NATIONAL–Natuod hi House Speaker Faustino “Bojie” Dy III nga posible himuon nga modelo hiton mga masunod nga reporma ha Kamara an ginbubuhat nga nationwide consultations kanit hiton ginduduso nga Anti-Political Dynasty Act.
Sumala kan Speaker Dy, an mga regional hearings ha Cavite, Cebu ngan Cagayan de Oro nga ginpangunahan han House Committee on Suffrage and Electoral Reforms Chairman ngan Lanao del Sur Rep Zia Alondo Adiong in pruweba nga posible igbalhin ha taumbayan an proseso han paghimo hin balaod.
Ginpahayag hine nga an nagin eksperyensya ha mga konsultasyon in posible magserbe kumo template ha paghihisgut han iba pa nga masunod nga importante nga balaudnon.
Ha presente, ginco-consolidate na han Komite an 24 nga balaudnon kontra ha political dynasty, kalakip an House Bill No. 6771 nga sinurat nira Dy ngan House Majority Leader Ferdinand Alexander “Sandro” Marcos, agud nga makapagbug-os hin usa nga substitute bill.
Gintagan naman hin duon ni Dy nga an mahaluag nga konsultasyon in nagpapakusog ha balaud ngan pagtapod han publiko.
Ginmalatumat naman ni Speaker Dy nga kun an tinuod nga tumong an people-centered governance, dapat magin aprte han kultura han pamamangulo an pamamati nga pakiki-koordinar ha mga mulupyo tikang ha Luzon, Bisayas, ngan Mindanao.
Dugang pa niya, pwede pa buhaton an kaparehas nga regional consultations para ha iba pa nga prayoridad nga balaudnon han Kamara.
