TACLOBAN CITY – Nahipatik an usa nga insidente han panmumusil kun diin, patay an usa nga lalaki ha Tzu Chi Village, Brgy. Sto. Nino, Kananga, Leyte.
Ginkilala an biktima kan alyas Allan, 50 anyos an pangidaron, anay kagawad ngan residente han mao nga lugar. Samtang, an suspek naman in kinilala nga hi alyas Danny, 38-anyos, ngan usa nga construction worker ngan residente gihapon han nasabi nga barangay.
Basar hiton imbestigasyon han mga otoridad, napalit an biktima hin barbeque han tigda nala ini panmumusilon han suspek kun diin, naigo an dughan hini nga parte rason han dayon nga kamatayon hini.
Ginprubaran pa nga dad-on an biktima ha kahirani nga ospital pero gindeklara na ini nga dead-on-arrival.
Nagbuhat naman hin hot-pursuit operation an mga kapulisan kun diin, dayon nga nadakop han mga ini an suspek ngan nakumpiskar ha iya an usa nga magnum caliber nga pusil ngan may 4 nga live ammunition.
Samtang, nakapaslak na an suspek ha presuhan agud atubangon an kaso hini nga murder ngan nagpapadayon gihapon an imbestigasyon han mga otoridad agud masabtan an motibo han krimen.
