TACLOBAN CITY- Pira nga mga ekonomista ha rehiyon, nasipatan an madagmit nga paghitaas han inflation ha Sinirangan Bisayas, partikular na han nakalabay nga bulan hiton Setyembre 2025.
Sumala Eastern Visayas State University, Economist, Prof. Christopher Bacungan, sinmaka ha 1.7 % an ginhitaas han inflation rate ha rehiyon, kumpara han nakalabay nga bulan han Agusto nga ada la ha 1.5% inflation rate.
Ginmalatumat naman hine nga an 1.7% nga inflation rate in hamubo ha orihinal nga target han Bangko Sentral ng Pilipinas, ha 2-4% yana nga tuig.
Dugang pa hine, lauman naman han publiko, nga posible sumaka pa an presyo han pira nga mga produkto ha masunod nga bulan, matungod na gihapon ha tikaharani nga holiday season, kun diin kasagaran mangud nga namag-uumento an pira nga papliton kinada pasko ngan bag-o nga tuig.
Usa ha ira ginpapatamakan nga rason han paghitaas han inflation rate ha rehiyon an pagsaka han presyo han transportation cost, ngan sugadman an paghitaas han presyo han pira nga mga utanon, matungod na gihapon han mga nakalabay nga kalamidad nga umigo ha rehiyon.
