-- Advertisements --
INTERNATIONAL–Umabot na ha 55 an ihap han mga namatay matungod ha makusog nga pag-uran, pagbaha, ngan landslide ha central Vietnam, samtang 13 naman an nahitala nga nawawara, sumala ha disaster agency han nasud han Sabado.
Lumapos ha 1,900 mm an pag-uran ha pira ka parte han central Vietnam ha naglabay nga semana.
Haros katunga han mga namatay in adto ha probinsya han Dak Lak, kun diin 27 an namanat, samtang 14 naman an namatay ha probinsya ha Khanh Hoa.
Nahitala nga umabot ha 8.98 Trilyon ka Dong o 341-M ka dolyar an nagin kantidad han danyos durot han pagbaha ha ekonomiya, sumala ha gobyerno.
Sobra 235,000 naman nga panimalay an nabalot han baha ngan haros 80,000 ka ektarya hin mga pananom an naruba.
