INTERNATIONAL – Iginpagawas han rebelde nga grupo nga Houthi an video han ira pag-atake ha Liberia-flagged Bulk Carrier nga Eternity C ha Red Sea didahan nakalabay nga Hulyo 7, 2025 nga nagin rason han kamatayon han tulo nga tripulante.
Makikit-an ha video an mga ginlunsar nga missiles han Houthi kutob ha pira nga sagunsun nga pagbuto ha cargo ship nga napalunod hini. Makikit-an gihapon an pira nga armado nga kalalakin-an nga sumakay ha nasabi nga barko ngan iginpakita an mga ruba nga na-angkon han cargo ship.
May sakay nga 25 nga tripulante an barko han tigda nala nga ma-igo han ginlunsar nga ballistic ngan cruise missiles han Houthis nga grabe nga nakagruba ha barko. Kadam-an nga sakay han ginatake nga cargo ship in 21 nga mga Pinoy seafarers ngan mayda gihapon Russian national nga grabe nga nasamaran ngan nawarayan pa hin tiil.
Padayon naman nga ginbibiling an 15 nga tripulante nga nahipatik nga nawawara mahuman an pag-atake. Nauna na nga nasalbar han mga rescuer an unom nga seafarers mahuman an usa ka-adlaw nga pagkakababad han mga ini ha tubig
Manunumduman nga nag-ugat an mga pag-atake han Houthis ha mga barko nga may kalabutan ha Israel nga naagi ha Red Sea, kumo pakikisimpatiya ha ira kaalyado nga Palestinian rebel group nga Hamas ha Gaza nga nakikig-away naman kontra ha Israel.
