TACLOBAN CITY – Ginse-selebrar yana nga bulan han Mayo an Farmers and Fisherfolks Month kun diin gintatagan hin pagkilala an mga paru-pangisda ngan parag-uma dire la ha rehiyon, kundi ha bug-os nga nasud.
Sumala kan Bureau of Fisheries and Aquatic Resources Eastern Visayas Information Officer, Christine Gresola, pinaagi hine in nagkamay-ada hin opening ceremony an Department of Agriculture ha ira buhatan, ha Kanhuraw Hill, ha syudad han Tacloban, nga ginpartisiparan naman han Bureau of Fisheries and Aquatic Resources, magkaduru-dilain nga asosasyon han paru-pangisda ngan parag-uma, ngan mga indibidwal paru-pangisda.
Ha gin abrihan nga Kadiwa ng Pangulo, mapapalit naman an magkaduru-dilain nga produkto han mga parag-uma ngan paru-pangisda, sugad han presko nga isda, bulad, gourmet tuyo, bugas, mga duma, prutas, utanon ngan damo pa.
Gin aghat naman han nasabi nga tagapagyakan an publiko nga bumisita ha Kanhuraw Hill, ngan pumalit ngan suportahan an mga baligya han mga parag-uma ngan paru-pangisda.
Mapapalit naman ha mas barato nga kantidad an mga produkto ha Kadiwa ng Pangulo mahitungod nga direkta ha mga parag-uma ngan paru-pangisda an mga ine.
Mag-iiha naman kutob yana nga adlaw, Mayo 6, an nasabi nga Kadiwa ng Pangulo.
