TACLOBAN CITY – Iginduduso han Tacloban Unified Motorcab for Hire Drivers and Operators Association ha tulo nga resolusyon kasumpay ha panhatag han fuel subsidy, pag-umento han pamasahe han mga tricycle ha syudad, ngan an pagkakamay-ada hin ID system para ha mga MCH drivers.
Sumala kan Edgardo Waniwan, Presidente han Tacloban Unified Motorcab for Hire Drivers and Operators Association, ha ira ginkairustoryahan ha ira pagharampang in nagduduso hira hin umento nga P3 ha pamasahe—tikang ha P12 nga regular nga pasahe in ginduduso nira nga magin P15—pero magpapabilin naman ha P12 an pasahe para ha mga istudyante, senior citizens, ngan Persons with Disabilities (PWDs).
Igin kasubo naman hini an nagin anunsyo han Presidente nga suspendihon la anay an pagpatuman han dugang-pasahe ha mga Public Utility Vehicles (PUVs) pero waray daw hira mahihimo mahitungod nga ini man an tagmangulo han nasud.
Ha pamakiana naman daw niya ha Business Permit and Licensing Division han syudad kasumpay han fuel subsidy, an Department of Social Welfare and Development daw an maghahatag hini ha ira pinaagi han Assistance to Individuals in Crisis Situation (AICS) nga programa.
Gin pakiana gihapon hini ha opisina han BPLD nga kun an DSWD an maghahatag haira han fuel subsidy in hin-o an pwede makakarawat—an driver o operator o ngaduha—mahitungod nga mayda driver nga nagda-drive la pero dire iya an tricycle, ngan mayda gihapon operator nga nagpapamaneho han iya tricycle, ngan mayda operator nga hiya gihapon an nagda-drive han tricycle.
Sugadman, kun makakakarawat ba gihapon adton mga tricycle drivers nga waray pa maka-renew han ira rehistro mahitungod han magkadiru-dilain la nga rason ngan an mga riders, kun diin ginhangyo ni Efren Bacsal, sekretarya han asosasyon nga matagan gihapon an mga ini mahitungod nga lakip man hira ha mga nanginginahanglan.
Samtang, nagpasalamat naman hi Waniwan kan Engr. Garry Soriano han TOMECO mahitungod ha temporaryo nga pagsuspendi hini ha pira nga polisiya han TOMECO sugad han pag-aghat hini ha mga MCH drivers ngan operators nga waray maka-renew nga bisan kun waray pa hira makapamintar hin maupay basta mayda na mga suga in pwede na ini igpa-inspeksyon la anay ha ira, kumo pagkonsidera kadungan han nagpapadayon nga kasamok ha Middle East.
Gin kalipay gihapon hini an pagtugot ha ira nga mga MCH drivers nga magkamay-ada hin pila ha pagpapasakay han mga pasaheros agud dire na hira maglinibot-libot han syudad bisan kun waray pasaheros mahitungod nga nakakaubos gihapon ini hin gasolina, kun diin gin sigurado naman hini ha TOMECO nga dire hira magkakawsa hin trapiko.
Ha lain nga bahin, ginduduso gihapon han grupo an mandatoryo nga MCH drivers ID kun diin pinaagi hini in masisigurado an pangilal-an han driver sugadman an katalwasan ngan seguridad han pasaheros, ngan magduduso gihapon ini hin disiplina ngan pagbaton han kada MCH driver ha syudad mahitungod nga makikil-an man ini dayun kun igreklamo han pasaheros.
Dugang pa ni Joemar Raquiño, Public Information Officer han grupo, dire la an Tacloban an makaka-benepisyo hini kundi an ngatanan nga mabisita ngan masakay ha mga tricycle ha syudad han Tacloban.
