TACLOBAN CITY – Naugbaw hin sunog kanina han maagahon, Mayo 4 an usa nga stall ha merkado-publiko han syudad han Tacloban.
Sumala kan Tacloban City Supermarket OIC Market Superintendent, Ricardo Ogardo, an nasunog nga stall in an naapektaran han nahitabo nga sunog ha MASA Building dida han nakalabay nga tuig.
Nasunog an magkadiru-dilain nga produkto ha sulod han stall kun diin waray bisan usa an nasalbar.
Naapektaran naman an iba nga produkto han kasapit hini nga stall mahitungod han pagbomba han tubig agud mapuypoy an kalayo.
Samtang, gin klaro naman ni Ogardo nga usa la nga stall an nasunog, kabaliktaran han nagsasarang nga upat ka-stall.
Dayun naman nga narespondehan an sunog rason agud waray na magsarang an kalayo ha mga kasapit hini nga tindahan.
Sumala naman kan BFP Tacloban Fire and Arson Investigation and Intelligence Section Chief, SFO1 Jonald Lace, ginkikita nga tinikangan han sunog an pagtaga-kuryente o posible nga nabayaan nga nakasaksak.
Ha lain nga bahin, nagdig-on naman an tag-iya han stall nga waray hira may ginbayaan nga bisan ano nga nakasaksak ha sulod nga posible magin kawsa han sunog, labot nala han flourescent nga ira ginbabayaan nga abri kada gab-i agud magin malamrag an sulod han tindahan.
