TACLOBAN CITY – Nagpatuman hin energy conservation o pagtipid ha kuryente an pira nga bungto ha Sinirangan Bisayas kadungan han mga paru-patron.
Manunumduman nga dida han Marso 24, 2026 in nagpalusad hi Presidente Ferdinand Marcos Jr hin Presidential Executive Order No.110 (S. 2026) nga nagdedeklara hin State of National Energy Emergency kasumpay ha padayon nga tensyon ha Middle East nga nakakaapekto ha suplay han lana ha nasud.
Kasumpay hini, pira nga Local Government Unit an nagpalusad hin executive order ha paglimita han mga masunod: basketball tournament, pag-videoke, paggamit han kuryente, ngan iba pa ha panahon han kapatrunan.
Usa an bungto han MacArthur, Leyte ha mga nagpalusad han kamanduhan nga paglimita ha mga paghihimuon nga aktibidad han kada-barangay.
Nakakuha naman ini hin damo nga reaksyon tikang ha mga netizens mahitungod nga sumala ha mga ini, nagin kultura na han Pilipino an mga aktibidad sugad han disco ngan sarayaw kada kapatrunan.
Sumala kan Department of Interior and Local Government Regional Office 8 Director, Arnel Agabe, ginbuhat an nasabi nga resolusyon agud siguraduhon nga dire makonsumo hin sobra nga kuryente ngan gasolina an gobyerno.
Dugang pa hini, kinahanglan magtikang ha gobyerno an pagtitipid samtang dire pa nahuhuman an kasamok ha Middle East.
Ginlalauman naman han DILG nga magsusunod an mga Local Government Units ha nagin mandato han Presidente
