TACLOBAN CITY – Gin parayaw han Tacloban an padayon nga pag-ursa han Tacloban City National Agricultural School mahuman ini mahilakip ha Top 3 han Outstanding National Urban and Peri-Urban Agriculture Program Implementor para ha tuig-2026.
Sobra 200 nga nominees tikang ha magkadiru-dilain nga parte hiton nasud an bumulig ha kompetisyon, pero nanguna na nasabi nga iskuylahan ha bug-os nga Pilipinas.
Padayon naman an gindudumara nga final validation nga pagbubuhaton tinikangan ha Mayo 13 kutob Mayo 15, kun diin pipilion an magigin kampeon tikang ha Top 5 finalists. Dida han nakalabay nga tuig, ginkilala an iskuylahan kumo 2nd place ha regional level ha ilarom han micro category.
Yana nga tuig, sumaka ini ha macro category o an pinakahitaas nga level han pagkilala ha nasabi nga programa—ngan nakasulod pa ha national Top 3.
Ginbuhat an pagkilala ha ilarom han Agricultural Training Institute, kasugbong an Department of Agriculture, kumo kaparte han National Urban and Peri-Urban Agriculture Program.
Bisan man kun kaupod na ha mga nagdaog an iskuylahan, in dire pa ini sigurado kun magigin kampeon, first runner-up, o iba pa nga ranggo.
Sugadman, usa na ini nga dako nga dungog dire la para ha iskuylahan kundi para ha bug-os nga rehiyon, labi na nga ini la an nag-uusaan nga tinaglwas han rehiyon nga nakasulod ha nasabi nga kompetisyon.
