ENTERTAINMENT – Nagtitikahiluag an international career han aktres nga hi Lovi Poe mahuman makumpirma nga kaupod hiya ha thriller film nga ”Ignition” kaupod an Game of Thrones (GOT) star actress nga hi Maisie Williams.
Subay ha report han Variety, an nasabi nga pelikula in usa nga “high-concept thriller” nga igdidirek ni James Erskine. Kaupod gihapon ha cast an aktor nga hi Rory Kinnear.
Ha pag-istorya han Ignition, maganap hi William kumo Sylvie Johnson, usa nga babaye nga tigda nahisulod ha usa nga delikado nga sitwasyon mahuman makakarawat hin tawag nga mayda bomba an iya sarakyan. Mapipiritan ini nga sundon an mga mando han usa nga dire kilala nga tawo samtang nagbabaktas tikadto ha Royal Albert Hall.
Gagamiton ha pelikula an “live cinema” filming technique kun diin ginkukuhaan an mga eksena ha tinuod nga lokasyon gamit an multi-camera system agud makuha an mas matuod-tuod ngan intense nga performance han mga artista.
Sumala kan Erskine, panuyo han pelikula nga igpaabat ha mga magkirita an tensyon ngan pressure nga nae-eksperyensyahan han pangunahon nga karakter ha real time.
Ha iya social media post, ginmalatumat ni Lovi Poe nga malipayon hiya ha proyekto ngan iginkalipay an pagpapakilala han pelikula ha Cannes Film Festival yana nga Mayo.
