METRO MANILA – Ginbuyagyag han usa ha mga nadakop nga espiya han China ha Pilipinas nga nakakuha hiya hin impormasyon tikang ha iya sangkay nga opisyal han Philippine Coast Guard (PCG).
Basar han report, ginkilala an espiya nga hi alyas “Danny”, usa ha tulo nga mga Pilipino nga kapot yana han Armed Forces of the Philippines (AFP).
Sumala kan Danny, nagpakilala hiya nga negosyante ngan hiya in naghahatag hin impormasyon ha tawo nga nagpakilala naman nga US-based journalist.
Han una, an mga impormasyon nga ginhahatag ni Danny in abilable ha internet ngan ginbabaydan pa hiya, hasta gin-aaroan na hiya hin mga sensitibo nga impormasyon, labi na han nagpakilala hiya nga miyembro hiya han PCG.
Ginlimbongan niya an iya usa nga sangkay nga natrabaho kumo opisyal han PCG basi makakuha hin impormasyon tikang ha nasabi nga ahensya.
Sumala kan Danny, na-aabrihan niya an Messenger account han iya sangkay, sanglit, nakakakuha hiya hin impormasyon hiunong han mga sensitibo nga aktibidad han PCG, pero waray ideya an iya sangkay kasumpay hini.
Waray naman na ginpagawas nga kadugangan nga impormasyon an AFP kasumpay han ira mga ginbubuhat agud madakop an mga gin-aalegar nga espiya.
