TACLOBAN CITY — Ginpusil-patay an duha nga mga kalalaken-an nga ada ha sakto nga pangidaron ha magkaiba nga lugar ha probinsiya han Northern Samar.
An una nga biktima nga kinilala kan Rene Oligario Balesid, usa nga parag-uma nga ginpusil-patay han iya la igkasi parag-uma samtang nagkikita ha usa nga tupadahan ha Brgy. Ynaguingayan Pambujan, Northern Samar.
Basar ha inisyal nga imbestigasyon, samtang nagkikita han mao nga tupada an biktima in tigda umabot an suspek nga kinilala kan Erwin ngan didto ginpusil pira kabeses an biktima nga hinungdan han kaawat hini an kinabuhi.
Delito naman ha tuna an ginhihingita nga rason han panmumusil han suspek ha biktima.
Samtang, usa gihapon nga biktima nga kinilala kan Solomon Bernas, 66 anyos an ginpusil-patay han mga waray makilal-i nga suspek ha Brgy. Palanit San Isidro Northern Samar.
Basar hiton inisyal nga imbestigasyon, samtang nag-uupay hin pipeline an biktima harani la ha ira panimalay in tigda umabot an mga suspek ngan didto nakahigayon nga pusilon an biktima.
Mahuman an amo nga insidente in nakit-an an usa nga surat nga gintutuohan nga nagtikang ha gin-aalegar nga New Peoples Army (NPA).
Ha pagkayana in nagpapadayon pa an imbestigasyon han nasabi nga mga panmumusil ha mga biktima ha magkaiba nga lugar ha Northern Samar.
Sumala kan PLt. Col. Bonifacio Ricafort, Information Officer han NSPPO, padayon an panawagan han mga kapulisan ha publiko nga dayon makipagsumpayan ha ira pananglitan mayda makuha nga impormasyon bahin han nasabi nga mga insidente.
