TACLOBAN CITY – Nagwarning an Department of Trade and Industry (DTI) ha mga establisyemento nga dire nagsusunod han ginpapatuman nga Price Tag Law.
Sumala kan Department of Trade and Industry Consumer Protection Division Chief, Anna Eunice Bayden, nakaghipatik an ira buhatan hin pira nga mga pagtalapas han nasabi nga balaod, ngan nagpatuman na gihapon hin mga kaangayan nga sirot ngan penalidad.
Para han siyahan nga pagtalapas, magpapagawas an ahensiya hin warning letter kumo opisyal nga abiso, ngan kun dire la gihapon ine magsunod in posible nga igpasara an negosyo.
Ginpahimatngon gihapon ni Bayden nga bawal magbutang hin kadugangan nga kabaraydan ha mga pamaagi han pagbabayad ha bisan diin nga establisyemento.
Kun an usa nga produkto in nagkakantidad hin 20 pesos, dapat in ₱20 gihapon an babaydan han konsyumer, mapa- cash, e-wallet, credit card, debit card, o ATM.
Gin-aghat gihapon hine an publiko nga dire palagpason an mga sayop nga binuhatan han mga establisyemento ngan diretso ig-report an mga ini ha DTI.
Dugang pa ni Bayden nga panuyuan han Price Tag Law nga siguraduhon nga ngatanan nga produkto, guti man o dako in may-ada klarado nga presyo.
An price tag o price list in para ha impormasyon ngan proteksyon hiton konsyumer, ngan dire la para hiton tindahan. (via Bombo Shiela Encio)
