NATIONAL NEWS- Nakatalaan nga pangunahan han Department of Agriculture (DA) an pagbug-os han konstruksyon han mga farm-to-market roads projects nga pangunahon nga proyekto han Department of Public Works and Highways (DPWH).
Ha nagin paghihimangraw nira Agriculture Secretary Francisco Tiu Laurel Jr ngan ni DPWH Secretary Vince Dizon , gin-review han mga ine an audits han mga nakalabay nga FMR projects.
Ginpaghimangrawan gihapon han mga ine an mga proyekto yana nga tuig ha ilarom han FMR projects nga kinahanglan makompleto ha ilarom han catch up plan han DPWH.
Sumala kan Tiu Laurel Jr., kinahanglan nga mahuman an mga karsada ha dagmit nga panahon agud nga magamitan ine han mga parag-uma ngan mas mapadagmit an pakabuhi han mga residente.
Ha pagkayana, nag-aandam na an departamento para ha turn over han mga proyekto ha masunod nga tuig nga kaparte han catch up plan han administrasyon.
