NATIONAL – Nakatalaan nga pahamubo-on pa han Department of Agriculture (DA) an Maximum Suggested Retail Price (MSRP) ha mga imported nga premium nga bugas ha mga merkado yana nga ti-arabot nga Hulyo 16.
Tikang ha presyo nga 45 ka pesos kada kilo, magigin 43 ka pesos kada kilo nala igbabaligya an mga premium nga bugas.
Sumala kan Agriculture Secretary Francisco Tiu Laurel Jr., an nasabi nga pitad in para la ha mga 5% nga broken o guba na nga mga bugas, nga ka-urugan ginpapalit han mga consumer.
Manunumduman nga nagkaada na hin plano han una nga tikangan an adjustment ha presyo yana nga siyahan nga semana han bulan, pero mahitungod ha paghitaas han presyo han krudo, nga durot han tensyon ha Middle East, in waray dayon ini mapatuman han ahensya.
Subay ha departamento, humamubo ngan huminay na an tensyon ha butnga han Israel ngan Iran hinungdan nga puydi na nira igpatuman an nasabi nga presyo.
Ha lain nga bahin, ginsasapinal pa han DA an pagpapatuman hin MSRP ha mga produkto han baboy yana nga ti-arabot nga Agosto, pati na gihapon an produkto han manok ha Setyembre
