NATIONAL–Na-intercept han mga otoridad an purluminos P39.1-M nga kantidad hin cocaine nga ginaalegar nga gintago ha bagahe han usa nga babayi nga pasahero ha Ninoy Aquino international Airport (NAIA), sumala ha Philippine National Police han Domingo.
Ha pahayag han PNP, ginbuhat an anti-narcotics operation han NAIA Inter-Agency Drug Interdiction task group (NAIA-IADITG) han 29-30 han Enero, mahuman nga nakakarawat hin intelligence information kasumpay ah pag-abot han usa nga 38-anyos nga babayi nga pasahero nga nagdadara hin ginaalegar nga iligal nga droga.
Nasabtan nga tikang an mao nga pasahero ha Sao paulo, Brazil ngan umagi ha Doha, Qatar bago nakaabot ini ha NAIA Terminal 3.
Ha ginbuhat nga X-Ray screening, napansin han usa nga inspector han Bureau of Customs (BOC) an nakaka-suspeta nga butang sulod hin usa nga green trolley bag.
Dayon naman nga umialrom ha secondary isnpection an bagahe ha bulig han Philippine Drug Enforcement Agency (PDEA) K9 unit nga naghatag hin indikasyon ha presensya hin ilegal nga droga.
Ha manual inspection, nadiskubre an usa nga nakatago nga compartment nga mayada sulod nga 4 ka puch hin nga nakabalot hin tape, plastic, carbon paper ngan foil.
Didi nakumpirma ha pamaagi han Raman spectrometer field test nga an narekober nga substance in cocaine, nga mayada gintataya nga kabugosan nga standard drug price nga P39,181,660.
Dayon naman nga gindakop an babayi nga pasahero han NAIA Police Station 3 ngan presente nga adto ha kustodiya han NAIA-IADITG para ha ensakto nga dokumentasyon ngan legal disposition.
