Ginhimo nga colorful ni Bad Bunny an Levi’s Stadium ha iya pagperform ha Super Bowl halftime show dida han Dominggo, oras ha Amerika, kun diin presente an makulay nga kultura ha Puerto Rico kun diin gumawas gihapon hira Lady Gaga, Daddy Yankee, ngan Ricky Martin.
Ginsundan hine an record-breaking performance ni Kendrick Lamar dida han nakalabay nga tuig nga umabot ha sobra 130 milyon nga magkirita.
Iginpakita ni Bad Bunny o Benito Antonio Martínez Ocasio ha tinuod nga kinabuhi, an iya Puerto Rican heritage, gamit an reggaeton style.
Sul-ut an busag suit, gin abrihan han Grammy Award winner an show ha kanta nga “Tití Me Preguntó,” nga mayda backdrop han kinabuhi han Puerto Rican kun diin ginpapakita an mga parag-uma nga nag-uutod hin tubo, kalagsan nga nagmumulay hin domino, ngan mga nagtitinda hin lubi ngan piragua.
Ha secondary stage nga “La Casita,” gin kanta hine an “Yo Perreo Sola,” “Safaera,” ngan “Party,” samtang nasipatan naman an mga celebrity sugad kanda Pedro Pascal, Karol G, Cardi B, ngan Jessica Alba nga nasayaw ha crowd.
Usa pa ha pinakatampok ha eksena an pag-ambak hine tikang ha stage ngan pagsalo han fans samtang dudrungan nga ginkakanta an “Voy a Llevarte Pa’ PR,” ugsa bumalhin ha busag nga truck para ha medley han reggaeton classics nira Daddy Yankee, Don Omar, ngan an iya kanta “EoO.”
Ha katapusan nga parte han palabas, ginyakan han superstar an “God bless America” ngan iginsunod an roll call han mga nasud ha kontinente samtang iginsusulod an ira mga bandera—usa nga mensahe han pagkakaurusa ngan pag-decenter han ideya nga an “America” in uusa la nga nasud.
Sugadman, nakakakuha gihapon hin batikos an pagpili kan Bad Bunny kumo halftime performer, kaupod na hi US President Donald Trump, ngan pira nga konserbatibo nga grupo, mahitungod ha lantaran nga pagsukna han singer ha mga patakaran han Amerika ha imigrasyon.
Sumala pa kan Trump ha iya social media post: “absolutely terrible.”
