NATIONAL–Nanawagan hi House Committee on higher and Technical Education Chairman Jude Acidre ha Senado, ha pangungulo ni Senate President Vicente “Tito” Sotto III, nga igpadagmit an pagpasa han Bagong Balikbayan Act samtang yinukot-yukot nga Overseas Filipino Workers (OFWs) an umuli tikang ha nasud mahuman han holiday season.
Gintagan hin duon ni Acidre an importansya nga mapasa dayon an panukala agud nga igpaupay ngan igpakusog an mga programa nga mabulig ha pagsulod utro han mga OFWs ha lokal nga trabaho, Negosyo, ngan komunidad.
An House Bill No. 6643 o Bagong Balikbayan Act in nagtutumong nga ig-urosa an mga reintegrations services, igpahaluag an bulig ha pakabuhi, ngan maghatag hin klaro ngan nagpapadayon nga suporta ha mga nagbabalik nga migrante nga trabahador ngan an ira pamilya.
Gin-awtor naman ini ni anay House Speaker Martin Romualdez ngan gin-aprubaran na han Kamara.
Kalakip ha mga probisyon han panukala kay an pagtitikang hin reintegration assistance kutob 6 kabulan sano umuli an OFW, pagkakamayada hin regular job fairs, pagkilala ha skills nga nakuha ha iba nga nasud ngan pagpaptindog hin digital platform para ha job matching, training ngan iba pa nga serbisyo.
Sumala kan Acidre, an sayo nga pagpasa ine in makakabulig ha panginginahanglan han mga OFW ngan han ira pamilya yana nga nagpapadayon an pagdamo han mga nangunguli nga trabahador.
