INTERNATIONAL – Aminado an World Health Organization (WHO) nga nagpapabilin nga maluya ngan dire patas an progreso ha pankalibutan nga pangandaman kontra ha pandemya, labi na nga padayon nga nalihis an pondo han pira nga nasud pakadto ha depensa ngan seguridad.
Ha ika-unom nga tuig tikang han gindeklara an COVID-19 kumo global health emergency, ginduon han WHO nga may mga pitad na nga ginbuhat sugad han Pandemic Agreement dida han 2025 ngan mga pagbabag-o ha International Health Regulations.
Gintindog gihapon an Pandemic Fund nga nakaghatag hin sobra $1.2 bilyon para ha mga proyekto ha sobra 90 ka-nasud kaupod an pagpapakusog han surveillance, laboratoryo, ngan workfroce training.
Labot hini, humaluwag an akos ha genomic sequencing ngan naitindog an mga sentro para ha paghimo hin bakuna ngan biomanufacturing agud masigurado an patas nga akses ha medisina.
Sugadman, gintagan-duon ni WHO Director-General Dr. Tedros Ghebreyesus nga “solidarity is the best immunity” ngan nanawagan hin mas marig-on nga kooperasyon ha pankalibutan nga lebel.
