INTERNATIONAL – Padayon nga ginbibiling han Indian Coast Guard an upat nga iba pa nga tripulante nga nawawara mahuman an natabo nga dako nga sunog ha usa nga Singapore-flagged cargo ship ha kabutngaan han Arabian Sea, harani ha baybayon han Kerela, India.
Ha pagkayana, 18 ha 22 nga miyembro han nasabi nga barko an natalwas, samtang an mga nawawara nga mga tripulante in tikang ha Taiwan, Myanmar, ngan Indonesia.
Kasumpay hini, nagpadara na gihapon hin bulig an Singapore Maritime and Port Authority (MPA) agud suportahan an operasyon.
Manunumduman nga tikang pa ha Colombo, Sir Lanka an barko ngan tikadto unta ha Mumbai, India han tigda nagkaada hin makusog nga pagbuto an usa ha mga container van ngan naglarab hin kalayo, kun diin 50 nga containers tikang ha barko an nahulog ha dagat.
