Gin anunsyo ni U.S. President Donald Trump an tulo kaadlaw nga ceasefire ha butnga han Russia ngan Ukraine tinikangan yana nga Mayo 9 kutob Mayo 11 kumo paghinumdom ha paghuhuman han World War II para ha Russia.
Ha iya post ha Truth Social, ginmalatumat ni Trump nga kaupod ha ceasefire an temporaryo nga pag-undang han ngatanan han opensiba nga militar ngan pagbalyuay hin tag-mil nga preso tikang ha kada nasud.
“Hopefully, it is the beginning of the end of a very long, deadly, and hard fought war,” sumala kan Trump.
Syahan na nga ginmalatumat ni Trump nga mayda pagdudumaraon nga pag-istorya para ha mga temporaryo nga ceasefire mahuman an iya pakig-istirya kan Russian President Vladimir Putin dida han Abril 29.
Kadungan hini, nagdeklara gihapon an Russia hin kalugaringon nga ceasefire tinikangan dida han Mayo 8 kutob yana nga Mayo 9 kumo kaparte han paghinumdom hini ha kalangpusan han Soviet Union kontra ha Nazi Germany dida han World War II.
Samtang, gin suhestyon naman han Ukraine an open-ended ceasefire nga nagtikang dida han Martes ngan nanawagan ha Russia nga sumunod gihapon ha nasabi nga pitad.
Labot hini, umabot na gihapon ha Mimain an pangunahon nga negotiator han Ukraine nga hi Rustem Umerov para ha serye han paharampang kaupod an mga tinaglawas han Estados Unidos.
Sugadman, nagpapabilin nga dire nagkakasabot an magkaluyo nga parte labi na ha istoryahon han Donetsk region, sinirangan nga parte han Ukraine. Padayon gihapon nga gin aakusaran han Moscow ngan Kyiv an kada-usa hin pagtalapas ha mga nauna nga ceasefire declarations.
