INTERNATIONAL – Gin-aaligar nga patay ha natabo nga panmumusil han pwersa han Israel an 30 nga Palestino samtang naghuhulat hin mga ayuda ha norte han Gaza.
An mao nga impormasyon in tikang ha civil defense ministry nga ginpapadalagan han Hamas militants.
Sumala ha tagapagyakan han Gaza civil defense, samaran gihapon an 300 nga indibidwal ha nasabi nga insidente.
Pag-isplikar han kampo han Israeli Defense Forces (IDF), nagpabuto la an ira pwersa hin warning shots mahuman nga magpurundok an mga Palestino ha aid trucks nga tulo ka-kilometro an kaharayo tikang ha Zikim crossing ngan diri hira maaram kun mayda namatay.
Dugang pa han militar han Israel, an pagkatitirok han ira mga gintutudlok nga suspek in tarhog ha ira mga tropa hinungdan nga ginpapaharayo la hira pinaagi han warning shot.
Samtang, igindiwara naman han Israel an pagpapatuman hin restriksyon ha mga ayuda nga nasulod ha Gaza.
Basar ha datos han Hamas health ministry, sumaka na ha sobra 60,000 nga Palestino an napatay ha pag-atake han Israel ha Gaza tikang dida han Oktubre 7, 2023, lakip na an sobra 18,000 nga mga bata ngan sobra 9,000 nga kababayin-an.
