Ginpapanginano han SOCO team an tricycle nga ginsakyan han mga jail guards ngan lima nga mga inmates tikang ha usa nga court hearing ha Villaba, Leyte kon diin ginpanmumusil hira hin waray pa kakikila-i nga mga suspek.
Photo Courtesy: Ronnie Roa
TACLOBAN CITY – Dead on the spot an duha nga jail guards han Leyte Sub Provincial Jail ngan usa nga tricycle driver mahuman hira pagpamumusilon han waray pa kakikilal-i nga mga suspek ha Brgy. Tagbubunga, Villaba, Leyte Martes (Abril 16).
Ginkilala an mga jail guards nga hira Leo Gonzales ngan Genesis Piamonte ngan an tricycle driver nga hi Jay-R Escuton.
Nadara pa ha ospital an drayber pero gin-dinklara liwat nga dead on arrival.
Sumala kan Police Captain Edgar Octaviano, tagapagyakan han Leyte Police Provincial Office (LPPO) sakay hin tricycle an mga jail guards mahuman nira ig-escort an lima nga preso tikang ha court hearing ha Villaba ngan pabalik na unta ha Palompon, Leyte han pauranan hira hin bala hin riding in tandem.
Swerte naman nga waray kaigo an mga inmates ngan waray liwat ini magprubar hin pag-eskapo ngan naibalik na ini ha presuhan.
“So, an aton mga detainee so far waray lugod ini magkaaanu, unharmed ini hira ngan as of today nahibalik na ini hira ha kustodiya han Palompon Sub Provincial Jail”, pahayag ni Octaviano.
Gin iimbestigaran na gihapon an rason kon kay ano nga tricycle an gingamit paghatod han mga preso.
“Amo liwat ito an subject han aton investigation kay anu nga tricycle an ira gingamit ngan waray nira huna hunaa gihapon an ira security. Upod ito hit panginginanuon han Villaba Police Station kon mayda ba nira service ngan kon kay ano nga naggamit hira hin tricycle.” dugang nga pamayag ni Captain Octaviano.
Sumala naman ha usa nga source, lima na katuig nga nagamit hin tricycle an mga jailguards ha paghatod han mga preso ngadto ha mga court hearing tungod nga naruba an ira service vehicle han bagyong Yolanda ngan waray pa ini kaliliwani.
Padayon naman nga gin-aaram han mga kapulisan an motibo han krimen.
