TACLOBAN CITY – Nagbilin na liwat hin usa na patay mahuman na kumaon hin pangtion nga positibo ha paralytic shellfish poison o mas kilala nga red tide ha Brgy. Tigdarano, Tarangnan, Samar.
Ginkilala an biktima nga hi Rommel Balsote, 39 anyos ngan residente han mao nga lugar.
Mababaruan nga hi Rommel ngan lima pa nga myembro han iya pamilya in naconfine ha hospital mahuman na kumaon hin pangtion.
Base ha datos han Bureau of Fisheries and Aquatic Resources (BFAR) nga tikang Nobyembre 2 ngadto Nobyembre 21, in may ada na 39 nga nahospital nga mga katawhan mahuman nga nakakaon hin pangtion nga tikang ha kadagatan han Samar.
Man ngani 15 na an naapektuhan ha Tarangnan Samar, 12 ha Catbalogan, 3 ha Daram, 1 ha Sta. Rita, ngan 8 ha San Sebastian, Samar.
Base ha Shellfish Bulletin number 38 series of 2017, na positibo la gihapon han red tide an kadagatan han Daram, Irong-irong bay, Maqueda bay, Villareal bay ngan Cambatutay bay ha Western Samar, Matarinao bay ha Eastern Samar, ngan Carigara bay ha Leyte.
Mahugot la gihapon nga pahinumdom han BFAR nga likayan la anay an pagkaon han bisan ano nga pangtion mahitungod nga diri ini talwas kaunon han mga katawhan.
Samtang talwas na ha red tide toxin an Cancabato bay ha Tacloban, coastal waters han Calubian, Leyte Leyte ngan katubigan han Biliran province.
