NAVAL, BILIRAN – Patay an usa nga singko-anyos nga bata nga babayi mahuman ini nga malumos ha usa nga swimming pool ha usa nga beach resort ha Brgy. Catmon, Naval, Biliran dida han mga nakalabay nga adlaw.
Ginkilala an biktima kan alyas “Jen”, residente han Naval, Biliran.
Basar ha impormasyon, nakakarawat an lokal nga pulis han Naval hin report dida han kulop, tikang ha usa nga concerned citizen, nga may nahipatik nga drowning incident ha usa nga beach resort nga kun diin, dayon naman nga rumesponde an mga otoridad ha lugar han insidente.
Subay han imbestigasyon, nga dida han aga han adlaw han insidente, in mayda grupo hin 13 ka-tawo, nga ginbubug-os hin upat ka-adult ngan nuybi nga kabataan nga pumakadto ha swimming pool area han beach resort.
Ginsagdunan han caretaker han resort an mga kag-anak nga bantayon hin maupay an mga kabataan mahitungod nga bangin an mga ini pumakadto ha hilarum nga parte han swimming pool.
Naobserbaran naman han caretaker nga busy an mga kag-anak ha pagkuha hin litrato imbes nga magbantay. Pira ka-oras an nakalabay, in nagkalisang an mga kag-anak mahitungod nga nawawara an usa nira nga bata ngan namakiana an mga ini ha caretaker kun nakakita ini nga gumawas an ira bata ha swimming pool area.
Mahuman an ira pira ka-minutos nga panmiling, nakit-an nala nga waray na kinabuhi an 5-anyos nga biktima nga nakakulob ha ilarum han swimming pool, mahuman nga matad-an ini han kaupod liwat nira nga 12-anyos.
Dayon naman nga ginkuha han caretaker an biktima ha tubig ngan ginprubaran gihapon ini nga ig-salbar han usa nga nurse nga presente ha beach resort. Pero nasabtan nga pira na ini ka-oras nga nalumos.
Samtang, gindara an biktima ha Biliran Provincial Hospital kun diin, deklara ini nga dead on arrival.
