EASTERN SAMAR – Umabot na ha 37 an ihap han nahipapatik nga grassfire ha magkadiru-dilain nga lugar ha Eastern Samar yana nga duro an kapaso han panahon.
Sumala kan BFP Eastern Samar Provincial Fire Marshal, FCINSP Jimmy Pasague, ha usa kaadlaw in naabot ha duha o tulo an nahirereport ha ira nga kaso hin grassfire kun diin dayun naman nira nga ginrerespondehan.
Dugang pa hini, kumpara han datos han nakalabay nga tuig, in mas hitaas an ihap yana nga tuig han mga grassfire ha nasabi nga probinsya, kun diin duro ini nga makababaraka mahitungod nga bisan anu nga oras in posible nga magtikang an sunog.
Ha lain la nga datos, ada naman ha 16 nga kaso hin sunog ha mga residential areas an nahipatik bug-os nga probinsya kun diin usa han pinakarason ngan gintitikangan han sunog in duro nga kapaso han panahon ngan pago-overheat han mga gamit.
Nagpahinumdom gihapon hi Pasague ha publiko nga himuon an kada adlaw nga Fire Prevention Day agud malikayan an mga kaso hin sunog, labi na yana nga mapaso an panahon kun diin malaksi maglarab an mga gamit partikular na kun himo ha mga light materials ngan plastic.
Nagpahimatngon gihapon an otoridad nga mayda kaangayan nga sirot an hin-o man nga mapapatud-an nga gintuyo an pagsurit agud magkamay-ada hin sunog.
Nanawagan naman ini ha publiko nga unahon anay an pagtawag ha ira istasyon o diin man nga BFP stations ugsa kumuha hin video ngan mag-ala vlogger agud marespondehan dayun an insidente.
