NATIONAL – Kumo kaparte han gios-protesta ugsa an nagin ikaupat nga a State of the Nation Address (SONA) ni Pangulong Ferdinand Marcos Jr. kakulop nga adlaw, Hulyo 28, ginsunog han mga membro han Bagong Alyansang Makabayan (Bayan) Southern Tagalog an duha nga effigy nga gintawag nira nga “ZomBBM” ngan “Sara-nanggal”.
Subay ha grupo, nasimbolo an mga effigy ha mga “halimaw ha gobyerno” nga nagpapakuri ha mga Pilipino.
An “ZomBBM”, in pulong nga hango ha “zombie” ngan “BBM”, in ginde-describe hi Marcos kumo sunod-sunuran ha Estados Unidos, partikular kan U.S. President Donald Trump, nga ginbutanga ha luyo han effigy.
Samtang, an “Sara-nanggal”, naman nga hango ha ngaran ni Vice President Sara Duterte ngan ha “manananggal”, in mayda bulag nga pan-igbaw ngan pan-ubos nga lawas, kun diin nalutaw an dako nga kantidad han kwarta tikang ha ubos nga parte.
Manunumduman nga na-impeach hi Duterte han Kamara dida han Pebrero 5 mahitungod ha daw kwestyunable nga paggastos han pondo ha Office of the Vice President (OVP) ngan Department of Education (DepEd).
Bisan man kun ginbasura han Senado an kaso pinaagi han pagbabalik hine ha Kamara, igindeklara nga pagtalapas ha Konstitusyon han Korte Suprema an impeachment process ni VP Duterte.
Sugadman, gin klaro ni SC spokesperson Camille Ting nga dire hine ginlilimpyo hi Duterte ha mga alegasyon han korapsyon.
