Gin sukna ni Senator Erwin Tulfo an daw padayon nga pag talapas han pira nga negosyante ha na eksister nga price freeze, sugad man nanawagan ha Department of Trade and Industry (DTI) nga magbuhat hin aktuwal nga inspeksyon ha mga paralitan agud masiguro an proteksyon han mamaralit.
Igin patuman han DTI an price freeze kutob Mayo 10 kumo kabatunan ha pag hitaas han presyo han produkto nga petrolyo nga epekto han nagpapadayon nga tensyon ha middle east. Pero ha kaluyo hini, diri ini nasusunod, partikular na ha mga gudti nga tindahan ngan lokal nga mga merkado.
Sumala ha senador, an mga mamaralit nga naglalaum ha gudti nga mga tindahan an pinakaapektado ha mao nga buruhaton mahitungod nga limitado la an ira pag pipilian ha pamamalit han mga pangunahon nga panginahanglan.
Dugang pa hini, diri sadang an paglaom la ha mga igin hahatag nga dokumento sugad man pagduduon pa hini, kinahanglan maglatag han DTI hin mas aktibo nga presensya ha mga paralitan pinaagi han on-ground inspection.
Subay pa kan Tulfo waray pulos an mga programa nga ayuda kun diri mapupugngan an manipulasyon ha presyo han mga papliton.
Ha ilarom han balaod, an hino man nga matalapas han price freeze in ma atubang hin sirot sugad han administratibo nga kaso, pagmumulta, ngan posible nga pagkakapriso depende ha kabug-at han pag talapas.
