Gin tutudlok nga “reasonable” han usa nga grupo hin mag uruma an posibilidad nga pag abot ha P60 ngada ha P62 an presyo han kada kilo han bugas pagtamak hiton bulan hiton Setyembre.
Sumala kan Magsasaka Partylist Chairman Atty. Argel Cabatbat, ha kaluyo han pag hitaas han presyo, makakabulig naman ini ha mga mag-uruma agud makabawi ha padayon nga paghitaas han mga gastuson ha produksyon, ilabi na ha mga abono.
Samtang, gin klaro ni Cabatbat nga diri ini nangangahulugan hin dako nga kuhida para ha mga mag uruma mahitungod nga nagpapabilin nga hitaas an presyo han farm inputs.
Subay pa hini, kun magtitipid ha abono an mag-uruma, sigurado nga mahimubo an harvest han humay kun diin, lugod nga mas makakaapekto ini ha kuhida han mag-uruma.
Naglalauman naman an grupo nga diri na malapos ha P60 ngada P62 an presyo han bugas agud diri mabugatan an mga mamaralit.
Subay hini, panuyuan hini nga pitad in agud makuha an patas nga presyo para ha mga mag-uruma ngan consumer.
Gin malatumat pa ni Cabatbat an kahadlok ha nagpapadayon nga tensyon ha Middle East, nga puydi magdurot hin domino effect ha paghitaas han presyo han lana ngan iba nga papliton, kaupod na an bugas.
