NATIONAL NEWS– Ginbuyagyag ni anay House Appropriations chair Zaldy Co kan Pangulong Ferdinand Marcos Jr. an gin-aaligar nga serye nga dako nga tapyas ha 2025 national budget nga haros ₱110 bilyon an iginmando daw ni anay Senate President Francis “Chiz” Escudero ha bicameral conference committee.
Ine an nakasulod ha surat nga iginpadara ni Co kan Pangulong Marcos.
Sumala kan Co, gindig-unan ni Escudero an pagtangal han ₱74 bilyon nga subsidy para ha PhilHealth, P10 bilyon tikang ha DepEd computerization program, ngan ₱1.692 bilyon para ha bag-o nga posisyon han mga magturotdo nga maglilimitar ha kapasidad han gobyerno nga mag-hire hin 20,000 nga mga magturotdo.
Gintapyasan gihapon hin ₱10 bilyon para ha fertilizer vouchers han Department of Agriculture ngan ₱13.9 bilyon para ha flagship infrastructure projects, kalakip na an pondo para ha paghingayad hiton mga kakarsadahan ha Batangas ngan Quezon.
Ginmalatumat pa ni Co nga an mga gin-iban in resulta han hingyap hiton Senado nga ₱200-bilyon nag pondo para ha pankalugaringon nga prayoridad.
