INTERNATIONAL – Nagprotesta an yinukot-yukot nga tawo ha Ankara, Turkey kun diin ginpanawagan han mga ini an pagbubul-iw na ha Pwesto ni Pres. Recep Tayyip Erdogan.
Ginbuhat han pira nga molupyo han mao nga nasud an rally kasunod han pira na ka-tuig nga legal crackdown ha mga miyembro han Republican People’s Party sugad gihapon an nakatalaan nga pagpapatanggal ha presente nga lider han Republican People’s Party ngan lider han Main Opposition nga hi Ozgur Ozel ha butnga han nakatalaan nga paghatol han korte dida han Setyembre 15.
Ha pagdungog yana nga adlaw, nakatalaan nga baliktaron an resulta han botosay ha CHP congress dida han Nobyembre 2023 mahitungod ha natabo nga panlimbong han mga botos.
Kumo pagpapakita han pagbaribad ha pagdungog kontra ha Opposition leader, nagkatitirok an mga miyembro han partido ha Tandogan Square ha Ankara, gab-i ugsa an pagdungog yana nga adlaw.
Ha usa nga footage, mababatian an mga protester nga naguliat para ha pagbubul-iw han presidente han Turkey samtang ginwawagay-way an bandila han ira nasud ngan banners han partido.
