Naghatag hin panibag-o nga pahimatngon hi US President Donald Trump ha Iran mahuman hini igpahayag nga kinahanglan gumios dayun an Tehran para ha peace deal kun dire hini karuyag maubos.
“For Iran, the Clock is Ticking, and they better get moving, FAST, or there won’t be anything left of them,” pahayag ni Trump.
Ha usa nga post ha Truth Social, ginmalatumat ni Trump nga madagmit nauubos an oras para ha Iran samtang nagpapadayon an kasamok nga nagtikang mahuman magdumara hin haluag nga pag-atake an Estados Unidos ngan Israel kontra ha Iran dida han Pebrero 28.
Padayon nga nakukurian an magkaluyo nga parte nga magkasabot ha peace negotiations, samtang nagtitikaduro an epekto han kasamok ha Middle East kun diin apektado na an world price han lana.
Kadungan hini, nahipatik han Israeli military nga utro nagpabuto hin sobra-kulang 200 projectile an grupo nga Hezbollah kontra ha Israel dida han nakalabay nga weekend, bisan kun mayda nagpapadayon nga ceasefire extension ha butnga han Israel ngan Lebanon.
Samtang, ginmalatumat naman han Lebanon health ministry nga lima katawo, kaupod an duha nga bata, an namatay ha panibag-o nga airstrikes han Israel ha southern Lebanon.
