TACLOBAN CITY — Arestado han mga kapulisan an usa nga lalaki mahuman ini mangawat hin diesel ha usa nga nakaparada nga truck han usa nga hardware ha Barangay 37, Rizal Avenue, Tacloban City dida han kaagahon han mga nakalabay nga adlaw.
Ginreport an suspek mahuman madakpan ha CCTV an pangawat hini hin maabot 70 ka-litro hin diesel nga nagkakantidad hin P8,050 ha service vehicle han mao establisyemento.
Subay ha impormasyon, nadiskubrehan han driver han hardware nga hi alyas “Mark” dida han aga han pagprubar hini nga pag-paandar han sarakyan kun diin nakit-an hini nga waray na sulod nga diesel an tangke han sarakyan ngan hukal gihapon an takop hini rason han dayon nga pag-sumat hini ha tag-iya han hardware.
Dida han gin-review nira an CCTV footage nakit-an an suspek nga dumaop ha sarakyan ngan ginsuyop an diesel gamit an usa nga hose ngan ginbalhin ha usa nga container nga nakaputos hin sako ugsa ini kumaligiw.
Dayon naman nga ginreport han tag-iya an insidente ha kapulisan kun diin ha pamaagi han ira rogue gallery, na-identipika an suspek nga ginkikilala kan alyas “Ben”. Residente han mao nga barangay ngan waray trabaho.
Ha pagkayana in naka-detain na ha Tacloban City Police Office – Police Station 2 an mao nga suspek kun diin maatubang ini hin kaangayan nga kaso.
