TACLOBAN CITY – Igin kalipay han City Government an plano nga pag-aabri han bag-o nga terminal building han paluparan ha Tacloban, nga ginlalauman magpapakusog ha aktibidad nga pan-ekonomiya han syudad.
Sumala kan Tacloban City Mayor Alfred Romualdez, bisan man kun dire ini mag-aabri ha syahan nga kwarter han tuig sugad han syahan nga nahi-report, in nagpapabilin nga positibo an ginlalauman nga paglulunsar hine yana nga tuig.
Dugang pa hini, damo pa an kinahanglan humanon ugsa ini magin operational, pero nalilipay naman ini nga madadayon ini yana nga tuig, kadungan han pagpapasalamat ha suporta ni Presidente Ferdinand Marcos Jr. ha nasabi nga proyekto.
Ha pagbisita han Presidente ha probinsya dia han Hulyo 2025, ginpahayag hini an panuyo han gobyerno nga igduso an Tacloban Airport kumo usa nga international gateway ugsa mahuman an 2026.
Ginlalauman naman han lokal nga gobyerno nga mag-aabri ini hin mas damo nga oportunidad ha pamumuhunan ngan turismo ha oras nga magtikang an international flights.
Sugadman, gin kumpirma han usa nga opisyal han Regional Development Council (RDC) nga nagkamay-ada hin gutiay nga pagkadelatar an proyekto mahitungod ha pira nga isyu, kalakip na kakulangan ha tawuhan ngan materyales. Ha kaluyo hini, in target ini nga magin andam para ha international operations pag-abot han Disyembre yana nga tuig.
Ha datos han RDC para ha ikaupay nga quarter han 2025, umabot na ha 98.054% an completion han Passenger Terminal Building I dida han Mayo 2025 pero nakaghipatik ini hin 3.86% nga negative slippage, kun diin ginpahamtangan hin liquidated damages an kontraktor ngan posible nga igpailarom ha termination an kontrata mahitungod ha pagka-delatar.
Gin sigurado naman han Civil Aviation Authority of the Philippines nga babantayan an pagsunod han kontraktor ha catch-up plan agud mapadagmit an implementasyon han proyekto.
Samtang, nakompleto na han Department of Public Works and Highways an 100 porsyento han airport facility component hini. Umabot na ha 77.39% an Passenger Terminal Building II, samtang mas timprano hin 2.35% ha iskedyul an asphalt overlay han runway nga ginhihimo han Department of Transportation.
Ginlalauman naman nga mahuhuman ngan operational na an ngatanan nga parte han Tacloban Airport Development Project pag-abot han tuig-2028.
An Daniel Z. Romualdez Airport an paluparan nga nagseserbi nga pangunahan nga aragian han Sinirangan Bisayas tikadto ha Manila ngan Cebu, ngan mayda 24 nga biyahe kada-adlaw, kun diin nakaghipatik ini hin 1.69 milyon nga pasaheros dida han 2024.
