Naaatubang ha damo nga kaso an 15-anyos nga lalaki ha Wiesbaden, Germany mahuman mangawat hin pampasaheros nga bus agud igdul-ong ngan kuhaon an iya uyab ha iskuylahan ha iba nga syudad.
Subay ha report, nakalusot an binatilyo ha usa nga bus depot banda alas-6 han aga dida han nakalabay nga Biyernes, nakuha an master key, ngan naitakas an sarakyan.
Bisan man kun nakita ha CCTV an paglakat han bus, in ginhuna la han mga empleyado han kumpanyang nga usa ini nga lehitimo nga driver nga nagtikang ha iya pasada. Kulop na han ma-realize han mga hini nga kinawat ngay-an an bus.
Gamit an GPS tracker, madagmit nga natad-an han pulisya an bus ha Karlsruhe, usa nga syudad nga mayda kahirayo nga 130 kilometro tikang ha Wiesbaden. Nahikalasan an mga otoridad han parahon nira an sarakyan ngan makit-an nga usa nga batan-on an nagmamaneho. Kaupod hini an iya 14-anyos nga uyab nga kakukuha la niya ha usa nga iskuylahan ngan igbibiyahe na unta pabalik.
Duro naman nga igin kapausa han pulisya kun patiunan-o nakuha han lalaki an susi ngan patiunan-o ini nahibaro pag-maneho hin sugad kadako nga saakyan hin waray kakuri-kuri.
Naaatubang an lalaki ha mga kaso nga pangawat ngan unlicensed driving. Waray naman naaksidente ha bug-os nga biyahe ngan nahibalik an bus hin waray anuman nga ruba ngan gasgas.
