NATIONAL NEWS– Gin-aandam na ni Senator Risa Hontiveros an kabatunan hine kontra ha kaso nga harasment ngan pagpapasarang hin sayop han anay witness hine ha Senate hearing.
Ine in mahuman an paglanta han usa nga Michael Maurillo o alyas “Rene” nga nagpahayag nga ginpirit hiya han senador para tumitigo kontra kan anay Pangulong Rodrigo Duterte, Vice President Sara Duterte ngan kan Pastor Apollo Quiboloy.
Una hine, nagpahayag an senadora nga mayda hira ebidensya nga an ginpahayag ni alyas Rene in puros mga binuwa.
Dugang pa hine, tanan nga testigo nga ginpre-presenta ha senado in boluntaryo ngan may kagawasan nga magpahayag han ira testimonya.
Gindig-unan pa hine nga mayda hira mga papeles tikang ha magkalain-lain nga ahensya nga nagpapamatuod nga an nasabi nga mga ine in puros alegasyon la ngan waray kamatuoran.
Dako iton pagtuo han senadora nga ginbayaran ine ni Quiboloy para gubaon an iya reputasyon ha senado.
